ബാലഭാസ്കറിൻ്റെ മരണത്തിൽ ദുരൂഹത നീക്കാൻ രക്തസാമ്പിളുകൾ അടക്കം പരിശോധിക്കുന്നു
തിരുവനന്തപുരം: വയലിനിസ്റ്റും സംഗീത സംവിധായകനുമായ ബാലഭാസ്കറിൻ്റെ മരണത്തിൽ കൂടുതൽ അന്വേഷണത്തിനായി പോലീസ്. സെപ്റ്റംബർ 25ന് തിരുവനന്തപുരം പള്ളിപ്പുറത്ത് വെച്ചാണ് ബാലഭാസ്കറിൻ്റെ കാർ അപകടത്തിൽപ്പെട്ടത്. സംഭവത്തിൽ വിശദമായ അന്വേഷണം വേണമെന്ന് ആവശ്യപ്പെട്ട് ബാലഭാസ്കറിൻ്റെ പിതാവ് ഡിജിപിക്ക് പരാതി നല്‍കിയിരുന്നു. കൂടുതൽ അന്വേഷണത്തിൻ്റെ ഭാഗമായി ശാസ്ത്രീയ തെളിവുകൾ പോലീസ് ശേഖരിക്കും. അതിനായി രക്ത സാമ്പിളുകളും, പോസ്റ്റുമോര്‍ട്ടം റിപ്പോര്‍ട്ടും പരിശോധിക്കും
അപകടം നടന്ന സമയത്ത് വാഹനം ആരാണ് ഒാടിച്ചെതെന്ന മൊഴിയിൽ നിലവിൽ വൈരുധ്യങ്ങളുണ്ട്. ഡ്രൈവ‍ർ അ‍ർജുനാണ് വാഹനം ഒാടിച്ചതെന്നും ബാലഭാസ്ക‍ർ പിൻ സീറ്റിൽ വിശ്രമത്തിലായിരുന്നെന്നും ഭാര്യ ലക്ഷ്മി പറയുന്നു. എന്നാൽ ബാലഭാസ്കറിനെ ഡ്രൈവിംഗ് സീറ്റിൽ കണ്ടതായി സംഭവ സ്ഥലത്തെത്തിയ സാക്ഷികൾ പറയുന്നു. ബാലഭാസ്‌കറാണ് അപകടം നടക്കുന്ന സമയം വാഹനം ഓടിച്ചിരുന്നത് എന്നാണ് ഡ്രൈവര്‍ അര്‍ജുനും മൊഴി നൽകിയിരിക്കുന്നത്.
ശരീരത്തിലേറ്റ മുറിപ്പാടുകളുടെ ആഴം, സീറ്റിലും സ്റ്റിയറിങ്ങിലും പടര്‍ന്ന രക്തം തുടങ്ങിയവ പരിശോധന വിധേയമാക്കും. ഇതിൽ നിന്നും വാഹനം ഓടിച്ചിരുന്നത് ആരാണെന്ന് കണ്ടെത്താന്‍ സാധിക്കുമെന്നാണ് അന്വേഷണ സംഘം കരുതുന്നത്. ശാസ്ത്രീയ ഫലം രണ്ട് ദിവസത്തിനുള്ളില്‍ ലഭിക്കുമെന്നാണ് സൂചന
