സി ആർ നീലകണ്ഠൻ അടക്കമുള്ളവരെ നയിക്കാൻ 29കാരൻ വരുന്നു; മാധ്യമ പ്രവർത്തകൻ തുഫൈൽ പി ടി ‘ആപ്പിന്റെ’ കേരളത്തിലെ പുതിയ അമരക്കാരൻ
ബെംഗളുരു: സിആർ നീലകണ്ഠൻ, സാറാ ജോസഫ്, എം എൻ കാരശ്ശേരി തുടങ്ങിയ പ്രധാന എഴുത്തുകാരും ബുദ്ധിജീവികളും പിന്തുണച്ചിട്ടും കേരളത്തിൽ പച്ചപിടിക്കാൻ ബുദ്ധിമുട്ടുന്ന പാർടിയാണ് ആം ആദ്മി പാർടി (എഎപി). ഈ അവസ്ഥ മാറാൻ പാർടി 29കാരനെ ഇറക്കുന്നു. ദേശീയ മാധ്യമ പ്രവർത്തകനായ തുഫൈൽ പി ടിയാണ് കേരളത്തിൽ ഒരുപക്ഷെ ആദ്യമായി ഒരു പാർടിയുടെ സംസ്ഥാന തലവനാകുന്ന 29കാരൻ.
ഈയിടെ വിവാദമായ കർണ്ണാടക സംഗീതജ്ഞൻ ടി എം കൃഷ്ണയുടെ സംഗീത കച്ചേരി വലതുപക്ഷ തീവ്ര സംഘടനകളുടെ ഭീഷണിയെ മറികടന്ന് ഡൽഹി സർക്കാർ നടത്തിയതിനു പിന്നിൽ പ്രവർത്തിച്ചത് തുഫൈലാണ്.
കോഴിക്കോട് ജനിച്ചുവളർന്ന തുഫൈൽ ചെന്നൈ ഏഷ്യൻ കോളജ് ഓഫ് ജേർണലിസത്തിൽനിന്നും പഠിച്ചിറങ്ങിയ ശേഷം തെഹൽക്കയിലൂടെയാണ് ശ്രദ്ധിക്കപ്പെട്ടത്. അതിനു ശേഷം സിനിമയിലേക്ക് തിരിഞ്ഞ തുഫൈൽ ജയരാജിന്റെ ദേശീയ അവാർഡ് ലഭിച്ച ഒറ്റാൽ മുതലായ ചിത്രങ്ങളിൽ സഹസംവിധായകനായി പ്രവർത്തിച്ചു. ശേഷം വീണ്ടും മാധ്യമ പ്രവർത്തനത്തിലേക്ക് തിരിഞ്ഞ തുഫൈൽ നിലവിൽ ദേശീയ മാസികയായ ‘ഔട്ട്ലുക്കിൽ’ സീനിയർ എഡിറ്ററാണ്.
കണ്ണൂർ കൊലപാതകങ്ങൾ അടക്കം കേരള രാഷ്ട്രീയത്തെപ്പറ്റി ശ്രദ്ധേയമായ അനേകം ലേഖനങ്ങൾ മലയാളത്തിലും (മാതൃഭൂമി, മാധ്യമം ആഴ്ചപ്പതിപ്പ് ഉൾപ്പെടെ) ഇംഗ്ലീഷിലുമായി എഴുതിയിട്ടുള്ള തുഫൈൽ ഡൽഹി കേന്ദ്രീകരിച്ച് പ്രവർത്തിച്ചുവരവെ എഎപിയുടെ ദേശീയ നേതൃത്വവുമായി അടുക്കുകയായിരുന്നു. ചൊവ്വാഴ്ച നടത്തിയ വാർത്താ സമ്മേളനത്തിൽ പാർടി തുഫൈലിനെ കേരള എഎപിയുടെ സംസ്ഥാന സെക്രട്ടറിയായി നിയമിച്ചതായി പ്രഖ്യാപിക്കുകയും ചെയ്തു.
