എന്‍ സി ബി തന്റെ വാട്‌സ്ആപ്പ് ചാറ്റുകള്‍ ദുര്‍വ്യാഖ്യാനം ചെയ്യുന്നുവെന്ന് ആര്യന്‍ ഖാന്‍
എന്‍ സി ബി (നാര്‍കോട്ടിക്‌സ് കണ്‍ട്രോള്‍ ബ്യൂറോ) തന്റെ വാട്‌സ് ആപ്പ് ചാറ്റുകള്‍ ദുര്‍വ്യാഖ്യാനം ചെയ്യുന്നുവെന്ന് ആര്യന്‍. ആഢംബര കപ്പലിലെ ലഹരി പാര്‍ട്ടിക്കിടെ പിടിയിലായ ഷാറുഖ് ഖാന്റെ മകന്‍ ആര്യന്‍ ഖാന്‍ പോലീസ് കസ്റ്റഡിയില്‍ തുടരുകയാണ്. തന്റെ ജാമ്യാപേക്ഷയ്ക്കായി ബോംബൈ ഹൈക്കോടതിയില്‍ ആര്യന്‍ ഖാന്‍ സമര്‍പ്പിച്ച ജാമ്യാപേക്ഷയിലാണ് എന്‍ സി ബി തന്റെ വാട്‌സ്ആപ്പ് ചാറ്റുകള്‍ ദുര്‍വ്യാഖ്യാനം ചെയ്യുന്നുവെന്ന പരാതി ഉന്നയിച്ചത്. പ്രത്യേക കോടതി ജാമ്യം നിഷേധിച്ചതിനെ തുടര്‍ന്നാണ് ഹൈക്കോടതിയെ ആര്യന്‍ ഖാന്‍ സമീപിച്ചത്. മുംബൈയിലെ ആര്‍തര്‍ റോഡിലുള്ള ജയിലിലാണ് ആര്യന്‍ ഖാനെ പാര്‍പ്പിച്ചിരിക്കുന്നത്. കേസുമായി ബന്ധപ്പെട്ട് ഇരുപതോളം പേരെ ഇത് വരെ എന്‍ സി ബി അറസ്റ്റ് ചെയ്തിട്ടുണ്ട്. അതേ സമയം പ്രതിപ്പട്ടികയിലെ അര്‍ബാസ് മര്‍ചന്റ്, അജിത് കുമാര്‍ എന്നിവര്‍ ഒഴികെ മറ്റാരുമായും ബന്ധമില്ലെന്നാണ് ആര്യന്‍ ഖാന്റെ വാദം.
