വഴിതടയല്‍ ചോദ്യം ചെയ്ത നടന്‍ ജോജുവിന്റെ വാഹനം തകര്‍ത്തു
ഇന്ധനവില വര്‍ദ്ധനവിന് എതിരെയുള്ള കോണ്‍ഗ്രസ് വഴി തടയല്‍ സമരത്തില്‍ പ്രതിഷേധവുമായി നടന്‍ ജോജു ജോര്‍ജ്ജ്. പ്രവര്‍ത്തകരോട് കയര്‍ത്ത നടന്റെ വാഹനത്തിന്റെ ചില്ല് പ്രവര്‍ത്തകര്‍ അടിച്ചു തകര്‍ത്തു. കോണ്‍ഗ്രസ് എറണാകുളം ജില്ല കമ്മിറ്റിയുടെ നേതൃത്വത്തില്‍ സംഘടിപ്പിച്ച വഴി തടയലില്‍ മണിക്കൂറുകളായി വഴിയില്‍ കുടുങ്ങി കിടന്നതോടെയാണ് നടന്‍ പ്രവര്‍ത്തകരോട് കയര്‍ത്തത്. നടന്‍ മദ്യപിച്ചിരുന്നുവെന്ന കോണ്‍ഗ്രസ് പ്രവര്‍ത്തകരുടെ പരാതിയില്‍ വൈദ്യപരിശോധന നടത്തിയെങ്കിലും ജോജു മദ്യപിച്ചിട്ടില്ല എന്ന് പരിശോധനഫലം വന്നിരുന്നു. അതേ സമയം സമരക്കാര്‍ക്ക് എതിരെ കയര്‍ത്ത നടന്‍ വനിതാ നേതാവിന് എതിരെയും അസഭ്യം പറഞ്ഞുവെന്നും കേസ് കൊടുക്കുമെന്നും കോണ്‍ഗ്രസ് പ്രവര്‍ത്തകര്‍ പറഞ്ഞു.
