കള്ളപ്പണം വെളുപ്പിക്കൽ കേസുമായി ബന്ധപെട്ടു രാജസ്ഥാനിലെ 25 സ്ഥലങ്ങളിൽ ഇഡി റെയ്ഡ് തുടരുന്നു

ജൽ ജീവൻ മിഷൻ അഴിമതിയുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ രാജസ്ഥാനിലെ 25 സ്ഥലങ്ങളിൽ എൻഫോഴ്‌സ്‌മെന്റ് ഡയറക്ടറേറ്റ് റെയ്ഡ് നടത്തുന്നു . പബ്ലിക് ഹെൽത്ത് എഞ്ചിനീയറിംഗ് വകുപ്പിലെ ഐഎഎസ് ഓഫീസർ സുബോധ് അഗർവാളിന്റെ സ്ഥലങ്ങൾ ഉൾപ്പെടെ ജയ്പൂരിലെ 25 സ്ഥലങ്ങളിലാണ് ഇഡി റെയ്ഡ് നടത്തുന്നത്. ഈ കേസിൽ സെപ്റ്റംബറിൽ അന്വേഷണ ഏജൻസി സമാനമായ റെയ്ഡുകൾ നടത്തിയിരുന്നു. ജൽജീവൻ മിഷനുമായി ബന്ധപ്പെട്ട് 13000 കോടി രൂപയുടെ അഴിമതി നടന്നു എന്നാണ് ഐഎഎസ് ഉദ്യോ​ഗസ്ഥൻ ഇഡിക്ക് നൽകിയ വിവരം. ഇതേതുടർന്ന് ശ്രീ ശ്യാം ട്യൂബ്‌വെൽ കമ്പനിയുടെ പ്രൊപ്രൈറ്റർ പദംചന്ദ് ജെയിൻ, ശ്രീ ഗണപതി ട്യൂബ്‌വെൽ കമ്പനിയുടെ ഉടമ മഹേഷ് മിത്തൽ തുടങ്ങിയവർ കൈകൂലി നൽകിയെന്നാണ് രാജസ്ഥാൻ അഴിമതി വിരുദ്ധ ബ്യൂറോ (എസിബി) എഫ്‌ഐആറിൽ പറയുന്നത്. നിയമവിരുദ്ധമായ സംരക്ഷണം ലഭിക്കുക, ടെൻഡറുകൾ നേടുക, ബില്ലുകൾ അനുവദിക്കുക എന്നിവയായിരുന്നു ആവശ്യങ്ങൾ. കൂടാതെ പിഎച്ച്ഇഡിയിൽ നിന്ന് ലഭിച്ച വിവിധ ടെൻഡറുകളുമായി ബന്ധപ്പെട്ട് നിരവധി ക്രമക്കേടുകൾ ഇവർ നടത്തിയതായും കണ്ടെത്തി. ഗാർഹിക ആവശ്യങ്ങൾക്കായി സുരക്ഷിതവും മതിയായതുമായ കുടിവെള്ളം ലഭ്യമാക്കുകയാണ് കേന്ദ്രം ആരംഭിച്ച ജൽ ജീവൻ മിഷൻ ലക്ഷ്യമിടുന്നത്. രാജസ്ഥാനിൽ സംസ്ഥാന പിഎച്ച്ഇഡിയാണ് പദ്ധതി നടപ്പാക്കിയത്. അതേസമയം രാജസ്ഥാനിൽ ഈ മാസം 25നാണ് 20 അംഗ നിയമസഭയിലേക്കുള്ള തിരഞ്ഞെടുപ്പ് നടക്കുക. രാജസ്ഥാൻ, മധ്യപ്രദേശ്, ഛത്തീസ്ഗഡ്, മിസോറാം, തെലങ്കാന എന്നീ സംസ്ഥാനങ്ങളിൽ ഡിസംബർ മൂന്നിന് വോട്ടെണ്ണൽ നടക്കും.