കോടതി ഉത്തരവിട്ടെങ്കിലും മല്യയെ ഉടൻ ഇന്ത്യയിൽ എത്തിക്കാനായേക്കില്ല
ലണ്ടൻ: വിവാദവ്യവസായി വിജയ് മല്യയെ ഇന്ത്യയ്ക്ക് കൈമാറാൻ ബ്രിട്ടണിലെ വെസ്റ്റ്മിൻസ്റ്റര് കോടതി ഉത്തരിവിട്ടെങ്കിലും മല്യയെ ഇന്ത്യയിലെത്തിക്കാൻ കാലതാമസമുണ്ടായേക്കും. ബ്രിട്ടണിലെ നിയമസംവിധാനം ഉപയോഗിച്ച് മല്യയ്ക്ക് കുറച്ച് കാലം കൂടി രാജ്യത്ത് തുടരാനായേക്കും.
മല്യയ്ക്കെതരിരെ പ്രഥമദൃഷ്ട്യാ കുറ്റം നിലനിൽക്കുന്നുണ്ടെന്നും വിചാരണ ചെയ്യാൻ ഇന്ത്യയ്ക്ക് കൈമാറുന്നതിൽ മനുഷ്യാവകാശ ലംഘനമില്ലെന്നുമായിരുന്നു ബ്രിട്ടണിലെ കോടതിയുടെ വിധി. ഇതിന്റെ തുടര്നടപടികള്ക്കായി ഉത്തരവ് ബ്രിട്ടീഷ് ആഭ്യന്തരമന്ത്രി സാജിദ് ജാവിദിന് കൈമാറായിട്ടുണ്ട്. ആഭ്യന്തരമന്ത്രിയുടെ ഉത്തരവ് ലഭിച്ചാൽ 28 ദിവസത്തിനകം മല്യയെ ഇന്ത്യയ്ക്ക് ലഭിക്കുമെങ്കിലും 14 ദിവസത്തിനകം മല്യയ്ക്ക് ഹൈക്കോടതിയിൽ ഇതിനെതിരെ അപ്പീൽ നല്കാനും അവസരമുണ്ട്. ഹൈക്കോടതി വിധി മല്യയ്ക്ക് എതിരാണെങ്കിൽ സുപ്രീം കോടതിയിലും ഹര്ജി നല്കാൻ അവസരമുണ്ട്. ഇത്തരത്തിൽ നിയമനടപടികള് നീണ്ടുപോയാൽ മല്യയെ ഇന്ത്യയിലെത്തിക്കുന്നതും വൈകും.
2019ലെ ലോക്സഭാ തെരഞ്ഞെടുപ്പിന് മുൻപായി മല്യയെ ഇന്ത്യയിലെത്തിക്കാനാകുമെന്നാണ് കേന്ദ്രസര്ക്കാരിന്റെ കണക്കുകൂട്ടൽ. എന്നാൽ നിയമനടപടികള്ക്ക് സമയമെടുത്താൽ ഇത് നടന്നേക്കില്ല.
താൻ തട്ടിപ്പുകാരനല്ലെന്നും വായ്പാതുക തിരിച്ചടയ്ക്കാൻ ഒരുക്കമാണെന്നുമുള്ള മല്യയുടെ വാഗ്ദാനം ബാങ്കുകള് തള്ളിയിരുന്നു. വെസ്റ്റ്മിൻസ്റ്റര് കോടതി വിധി പറയുന്നതിനു മുൻപായിരുന്നു ഇത് അറിയിച്ച് മല്യയുടെ ട്വീറ്റുകള്.
