ടി പി സെൻകുമാറിനെ നിരീക്ഷിക്കാനാണു തച്ചങ്കരിയെ നിയമിച്ചതെങ്കിൽ തൽസ്ഥാനത്തു തുടരാൻ അനുവദിക്കരുത് : ഹൈക്കോടതി
കൊച്ചി: ഡി.ജി.പി ടി.പി.സെൻകുമാറിനെ നിരീക്ഷിക്കാനാണോ ടോമിൻ തച്ചങ്കരിയെ പൊലീസ് ആസ്ഥാനത്തെ ഭരണനിർവഹണ ചുമതലയുള്ള ഡി.ജി.പിയായി നിയമിച്ചതെന്ന് ഹൈക്കോടതി സർക്കാരിനോട് ചോദിച്ചു. ഈ ഉദ്ദേശമെങ്കിൽ അത്തരത്തിൽ ഒരാളെ തത്സ്ഥാനത്ത് തുടരാൻ അനുവദിക്കരുതെന്നും കോടതി പറഞ്ഞു. സെൻകുമാർ പൊലീസ് മേധാവിയായി തിരിച്ചെത്തുന്നതിനു മുന്പ് പൊലീസിൽ നടന്ന സ്ഥലംമാറ്റങ്ങളും തച്ചങ്കരിയെ പൊലീസ് ആസ്ഥാനത്ത് ഡി.ജി.പിയായി നിയമിച്ചതിനേയും ചോദ്യംചെയ്ത് ആലപ്പുഴ സ്വദേശിയായ ജോസഫ് സമർപ്പിച്ച പൊതുതാൽപര്യ ഹർജി പരിഗണിച്ചപ്പോഴായിരുന്നു കോടതിയുടെ ഈ ചോദ്യം. കേസിൽ ടോമിൻ തച്ചങ്കരിക്കെതിരായ കേസുകൾ സംബന്ധിച്ച വിവരങ്ങൾ സമർപ്പിക്കാനും സർക്കാരിനോട് ഹൈക്കോടതി നിർദേശിച്ചു. ഇങ്ങനെയൊരു തസ്തികയുടെ ആവശ്യമെന്താണെന്നും കോടതി കുറ്റപ്പെടുത്തി.
