പോലീസ് കസ്റ്റഡിയിൽ തന്നെ അപായപ്പെടുത്താനുള്ള നീക്കമെന്ന് സുരേന്ദ്രൻ
കൊട്ടാരക്കര: തന്നെ തിങ്കളാഴ്ച രാത്രി പോലീസ് കോഴിക്കോട് നിന്ന് കൊട്ടാരക്കരയിലേയ്ക്ക് കൊണ്ടുവരാൻ ശ്രമിച്ചെന്നും ശക്തമായി പ്രതികരിച്ചതുകൊണ്ടാണ് അത് നടക്കാതെ പോയതെന്നും ബിജെപി ജനറൽ സെക്രട്ടറി കെ സുരേന്ദ്രൻ. തനിക്ക് കടുത്ത ആരോഗ്യപ്രശ്നങ്ങളുണ്ടെന്നും കെ സുരേന്ദ്രൻ പറഞ്ഞു. തന്നെ കസ്റ്റഡിയിൽ അപായപ്പെടുത്താനുള്ള ശ്രമമാണ് നടക്കുന്നതെന്നും സുരേന്ദ്രൻ ആരോപിച്ചു.
കൊട്ടാരക്കരയിലെത്തിച്ച സുരേന്ദ്രനെ ഇന്ന് തിരുവനന്തപുരം സെൻട്രൽ ജയിലിലേയ്ക്ക് മാറ്റും. ആരോഗ്യാവസ്ഥ പരിഗണിച്ച് ജയിൽ മാറ്റണമെന്ന സുരേന്ദ്രൻ്റെ ആവശ്യം പരിഗണിച്ചാണ് ജയിൽ മാറ്റുന്നത്.
ചിത്തിര ആട്ട വിശേഷസമയത്ത് ശബരിമല സന്നിധാനത്ത് 52കാരിയെ ആക്രമിച്ച കേസിലെ ഗൂഢാലോചനയിലാണ് കെ സുരേന്ദ്രൻ ജയിലിൽ കഴിയുന്നത്. നാളെ കേസിൽ പത്തനംതിട്ട കോടതി വാദം കേള്ക്കും. അറസ്റ്റിനു പിന്നാലെ സുരേന്ദ്രനെതിരെയുള്ള കേസുകള് കുത്തിപ്പൊക്കുകയാണെന്നാണ് ബിജെപി ആരോപണം. എന്നാൽ ഇത് സാധാരണ നടപടിക്രമം മാത്രമാണെന്ന് പോലീസ് വിശദീകരിച്ചു. അതേസമയം, ചിറ്റാര് പോലീസ് സ്റ്റേഷനിലെ ഉദ്യോഗസ്ഥരോട് അപമര്യാദയായി പെരുമാറിയെന്ന കേസ് തനിക്കെതിരെ ചുമത്തിയിട്ടുണ്ടെന്ന സുരേന്ദ്രന്റെ ആരോപണം പോലീസ് നിഷേധിച്ചു.
ആരോഗ്യാവസ്ഥ പരിഗണിക്കാതെ കേസന്വേഷണത്തിന്റെ പേരിൽ സുരേന്ദ്രനെയുമായി പോലീസ് കണ്ണൂരിലേയ്ക്ക് യാത്ര നടത്തിയത് മനുഷ്യാവകാശ ലംഘനമാണെന്നാണ് ബിജെപിയുടെ ആരോപണം. വിഷയത്തിൽ മനുഷ്യാവകാശ കമ്മീഷനെ സമീപിക്കാനും ബിജെപി ആലോചിക്കുന്നുണ്ട്.
