ശബരിമലയിലെ നിരോധനാജ്ഞ; സഭ സ്തംഭിപ്പിക്കുമെന്ന് യുഡിഎഫ്
പത്തനംതിട്ട: ശബരിമലയില് ഏര്പ്പെടുത്തിയിരിക്കുന്ന നിരോധനാജ്ഞ പിന്വലിക്കുന്നത് വരെ നിയമസഭ സ്തംഭിപ്പിക്കാനൊരുങ്ങി യുഡിഎഫ്. ശബരിമലയിലെ നിയന്ത്രണങ്ങളും നിരോധനാജ്ഞയും പിന്വലിക്കുന്നത് വരെ സഭയ്ക്കകത്തും പുറത്തും സമരം ശക്തമാക്കാനാണ് പ്രതിപക്ഷം തീരുമാനിച്ചിരിക്കുന്നത്. യുഡിഎഫ് പാര്ലിമെന്ററി പാര്ട്ടി യോഗത്തിലാണ് ഇക്കാര്യം തീരുമാനിച്ചത്.
ശബരിമലയില് ഏര്പ്പെടുത്തിയിരുന്ന നിരോധനാജ്ഞ നാല് ദിവസം കൂടി നീട്ടിക്കൊണ്ട് ഇന്നലെയാണ് ജില്ലാ കളക്ടര് ഉത്തരവിട്ടത്. ഡിസംബര് 30 വരെയാണ് നിരോധനാജ്ഞ നീട്ടിയിരിക്കുന്നത്. സന്നിധാനം, പമ്പ, നിലയ്ക്കല്, ഇലവുങ്കല് എന്നിവിടങ്ങളിലാണ് നിരോധനാജ്ഞ. എന്നാല് ഇത് ശബരിമല തീര്ത്ഥാടകരെ ദുരിതത്തിലാക്കുന്നുവെന്ന് ആരോപിച്ചാണ് യുഡിഎഫ് സമരത്തിനൊരുങ്ങുന്നത്. അതേസമയം ശബരിമലയില് പ്രശ്നങ്ങളുണ്ടാക്കുന്നവരെ മാത്രമാണ് നിയന്ത്രിക്കുന്നതെന്നും ഭക്തര്ക്ക് നിയന്ത്രണമില്ലെന്നും പോലീസ് വ്യക്തമാക്കുന്നു.
