‘ഒറ്റച്ചാട്ടത്തിന് ജീവനെടുക്കുന്ന ദൈവ’ത്തിന് ഒരു ദിനം: നവംബര്‍ 30
അമേരിക്കൻ ഭൂഖണ്ഡങ്ങളിലെ ഏറ്റവും വലിയ പൂച്ചവര്‍ഗത്തിൽപ്പെട്ട ജീവിയാണ് ജാഗ്വാര്‍. പുള്ളിപ്പുലിയെക്കാള്‍ വലുപ്പമേറിയ, കടുവയോടു സാമ്യമുള്ള ജാഗ്വറിന് വേണ്ടി ലോകത്താദ്യമായി ഒരു ദിനം ആചരിക്കുകയാണ് ഈ നവംബര്‍ 30ന്. വംശനാശഭീഷണി നേരിടുന്ന ജാഗ്വറുകളുടെ സംരക്ഷണത്തിന് ലോകശ്രദ്ധ ക്ഷണിക്കുകയാണ് ഉദ്ദേശം. ഡബ്ല്യൂ ഡബ്ല്യൂ എഫ് ആണ് ജാഗ്വര്‍ ദിനം ആചരിക്കാൻ ആഹ്വാനം ചെയ്തിരിക്കുന്നത്.
അമേരിക്കൻ ഐക്യനാടുകളുടെ ദക്ഷിണഭാഗങ്ങളിലും മെക്സിക്കോ, പരാഗ്വേ, അര്‍ജന്‍റീന തുടങ്ങിയ പ്രദേശങ്ങളിലാണ് ജാഗ്വറുകളെ കണ്ടുവരുന്നത്. ജലസാന്നിധ്യമുള്ള ഇടതൂര്‍ന്ന കാടുകളാണ് ജാഗ്വറുകളുടെ വാസസ്ഥലം. പൊതുവെ ഒറ്റപ്പെട്ട ജീവിതമാണ് ഇവ നയിക്കാറ്. അമേരിക്കൻ ഐക്യനാടുകളിൽ കാണപ്പെടുന്ന പുലിവര്‍ഗത്തിൽപ്പെട്ട ഏകജീവിയാണ് ജാഗ്വര്‍, പൂച്ചവര്‍ഗത്തിൽ ഏറ്റവും വലുപ്പമേറിയതും.
മുൻകാലങ്ങളിൽ യുഎസിന്‍റെ തെക്കൻ സംസ്ഥാനങ്ങള്‍ മുതൽ ഭൂമധ്യരേഖ പിന്നിട്ട് ദക്ഷിണ അമേരിക്കയുടെ തെക്കേയറ്റം വരെ കാണപ്പെട്ടിരുന്ന ജാഗ്വറുകള്‍ ഇന്ന് തെക്കേ അമേരിക്കയുടെ വടക്ക്, മധ്യഭാഗങ്ങളിലേയ്ക്ക് ഒതുങ്ങിയിരിക്കുന്നു. തെക്കേ അമേരിക്കയിലെ സ്യൂരിനാമിലും പരിസരപ്രദേശങ്ങളിലുമായി 15,000ത്തോളം ജാഗ്വറുകള്‍ മാത്രമാണ് ഇന്ന് ജീവനോടെയുള്ളത്.
ഒറ്റച്ചാട്ടത്തിന് കൊല്ലുന്നവൻ എന്നര്‍ത്ഥം വരുന്ന യാഗ്വാര്‍ എന്ന അമേരിക്കൻ ഗോത്രഭാഷാപദത്തിൽ നിന്നാണ് ജാഗ്വര്‍ എന്ന പദത്തിന്‍റെ പിറവി. അമേരിക്കയിലെ ഗോത്രവര്‍ഗക്കാര്‍ ജാഗ്വറിനെ ദൈവമായാണ് കണ്ടിരുന്നത്.
