കേരളത്തിന് കേന്ദ്രത്തിന്റെ 2500 കോടി പ്രളയാശ്വാസമായി ലഭിക്കും
ന്യൂഡൽഹി: പ്രളയ ദുരിതാശ്വാസമായി 2500 കോടി രൂപ കേരളത്തിന് അധികധനസഹായം ലഭിക്കും. കേന്ദ്ര ആഭ്യന്തരമന്ത്രി അധ്യക്ഷനായ ഉന്നത തലസമിതിയുടെ അംഗീകാരത്തോടെയാണ് കേരളത്തിന് പണം ലഭിക്കുക. 3100 കോടി രൂപയാണ് കേരളത്തിന് ആകെ ലഭിക്കുക. 600 കോടി രൂപ ഇതിനോടകം ലഭിച്ചിട്ടുണ്ട്. 4800 കോടി രൂപയാണ് കേരളം ധനസഹായമായി കേന്ദ്രത്തോട് അഭ്യർത്ഥിച്ചത്.
കേരളത്തിലെ പ്രളയദുരിതം ഉന്നതതല സമിതി യോഗം വിളിച്ചുചേർത്ത് അടിയന്തിരമായി ചർച്ചചെയ്യണമെന്ന് മുഖ്യമന്ത്രി പിണറായി വിജയൻ കേന്ദ്ര ആഭ്യന്തരമന്ത്രി രാജ്നാഥ് സിങ്ങിന് കത്തയച്ചിരുന്നു. 31,000 കോടി രൂപ കേരളത്തെ പുഃനർനിർമ്മിക്കുന്നതിന് ആവശ്യമായി വരുമെന്ന് ഐക്യരാഷ്ട്ര സഭയുടെകീഴിലുള്ള ഏജൻസികളുടെ സൂചിക ഇതിനോടകം വ്യക്തമാക്കിയിട്ടുണ്ട്.