സ്പീക്കർ സർക്കാരിന് ഒത്താശ ചെയ്യുന്നു: രമേശ് ചെന്നിത്തല

തിരുവനന്തപുരം: സ്പീക്കർ പി ശ്രീരാമകൃഷ്ണൻ ഏകാധിപതിയെന്ന് പ്രതിപക്ഷ നേതാവ് രമേശ് ചെന്നിത്തല. പ്രതിപക്ഷത്തിന്റെ അവകാശങ്ങൾ സ്പീക്കർ ഹനിക്കുന്നുവെന്ന് ചെന്നിത്തല ആരോപിച്ചു. ആത്മപരിശോധനയില്ലാത്തതിനാലാണ് സ്പീക്കർ പ്രതിപക്ഷം മര്യാദ ലംഘിക്കുന്നുവെന്ന് പറഞ്ഞതെന്നും വാർത്താ സമ്മേളനത്തിൽ പ്രതിപക്ഷ നേതാവ് വ്യക്തമാക്കി.

അതേസമയം പ്രതിപക്ഷ ബഹളത്തെത്തുടർന്ന് നിയമസഭ മൂന്നാം ദിവസവും പിരിഞ്ഞു. ചോദ്യോത്തര വേള റദ്ദാക്കി വിഷയം ചർച്ചചെയ്യണമെന്നായിരുന്നു പ്രതിപക്ഷത്തിന്റെ ആവശ്യം. വിഷയത്തിൽ ആവശ്യമായ ചർച്ചകൾ നടത്തിയിട്ടുണ്ടെന്നും സഭ തടസ്സപ്പെടുത്തരുതെന്നും സ്പീക്കർ ആവശ്യപ്പെട്ടു. പ്രതിപക്ഷത്തിനും മന്ത്രിമാർക്കും പരസ്പരം ആരോപണം ഉന്നയിക്കാനുള്ള വേദിയാക്കി മാറ്റരുതെന്ന് സ്പീക്കർ പറഞ്ഞു. സ്പീക്കർ മുൻവിധിയോടെ പെരുമാറുന്നുവെന്ന് പ്രതിപക്ഷം ആരോപിച്ചു.

അറിയപ്പെടാത്ത ഏതോ ലഹരിമരുന്ന് കഴിച്ചിട്ടാണ് പ്രതിപക്ഷം സഭയിലെത്തിയിരിക്കുന്നതെന്ന് ഭരണപക്ഷം ആരോപിച്ചു. അടിസ്ഥാന സൌകര്യങ്ങളുടെ അപര്യാപ്തത, തീർത്ഥാടകർ നേരിടുന്ന പ്രശ്നങ്ങൾ എന്നിവ മുൻനിർത്തിയായിരുന്നു പ്രതിപക്ഷത്തിന്റെ പ്രതിഷേധം.