ശബരിമലയിലേക്ക് പോകാൻ ശ്രമിച്ച സ്ത്രീകളെ മടക്കിയയച്ചു

ശബരിമല: സന്നിധാനത്ത് ദർശനത്തിന് എത്തിയ ആന്ധ്ര സ്വദേശികളായ രണ്ടു സ്ത്രീകളെ പോലീസ് മടക്കിയയച്ചു. കാഴ്‌ചയിൽ അമ്പത് വയസിന് മുകളിൽ തോന്നിക്കുന്ന ഒരു സ്ത്രീയാണ് ഒരാൾ. ഒരാൾ സംരക്ഷണം വേണമെന്ന് ആവശ്യപ്പെട്ട് പോലീസിനെ സമീപിച്ചിരുന്നു എന്നാണ് ലഭിക്കുന്ന വിവരം. ഇരുവരെയും പമ്പ പോലീസ് സ്റ്റേഷനിൽ കൊണ്ട് വന്നിരിക്കുകയാണ് ഇപ്പോൾ.

സ്ത്രീകൾ മരക്കൂട്ടം വരെ എത്തിയെന്നും പ്രതിഷേധത്തെ തുടർന്നാണ് ഇരുവരെയും താഴെ പമ്പയിലേക്ക് കൊണ്ട് വന്നത്. പോലീസ് സുരക്ഷ ഇല്ലാതെ സ്ത്രീകളെ സന്നിധാനത്തേക്ക് കയറ്റി വിടാൻ ശ്രമം നടന്നുവെന്നും ആരോപണമുണ്ട്. 1800 ഓളം പോലീസുകാർ ഡ്യൂട്ടിയിലുള്ള ശബരിമലയിൽ പോലീസ് നിരീക്ഷണം മറികടന്ന് എങ്ങനെ സ്ത്രീകൾ മരക്കൂട്ടം വരെ എത്തിയെന്നും വ്യക്തമല്ല.

പോലീസിന്റെ ഭാഗത്ത് നിന്ന് സുരക്ഷ വീഴ്ചയുണ്ടായതായി സംശയമുയരുന്നുണ്ട്. സന്നിധാനത്തേക്ക് പോകാൻ ശ്രമിച്ച സ്ത്രീകളുടെ പേര് വിവരങ്ങളോ ദൃശ്യങ്ങളോ പോലീസ് പുറത്ത് വിട്ടിട്ടില്ല. ഒരു സ്ത്രീയുടെ മുഖം പൂർണമായും തുണി കൊണ്ട് മറച്ചാണ് പമ്പയിലേക്ക് പോലീസ് കൊണ്ടു വന്നത്.