പ്രളയാനന്തര സഹായം വൈകുന്നുവെന്ന് പ്രതിപക്ഷം; സഭ നിർത്തിവെച്ച് ചർച്ച
തിരുവനന്തപുരം: സംസ്ഥാനത്തെ പ്രളയബാധിതര്ക്ക് സഹായം വൈകുന്നത് സംബന്ധിച്ച് പ്രതിപക്ഷത്തിന്റെ അടിയന്തിരപ്രമേയത്തിന് സ്പീക്കര് അനുമതി നല്കി. ദുരിതബാധിതര്ക്ക് സര്ക്കാര് സഹായം ലഭിച്ചില്ലെന്നും വിഷയം സഭ നിര്ത്തിവെച്ച് ചര്ച്ച ചെയ്യണമെന്നുമായിരുന്നു പ്രതിപക്ഷത്തിന്റെ ആവശ്യം. വിഷയത്തിൽ ചര്ച്ചയാകാമെന്ന് മുഖ്യമന്ത്രിയും അറിയിച്ചിട്ടുണ്ട്. ഉച്ചയ്ക്ക് ഒന്നു മുതൽ മൂന്ന് മണി വരെയായിരിക്കും ചര്ച്ച.
ശബരിമല യുവതീപ്രവേശനത്തിൽ നിന്ന് ശ്രദ്ധ തിരിച്ച് പ്രതിഷേധത്തിനായി പുതിയ വിഷയങ്ങള് കണ്ടെത്തുന്നത് കോൺഗ്രസിന്റെ പുതിയ രാഷ്ട്രീയനീക്കമായാണ് വിലയിരുത്തുന്നത്. ബിജെപി നേതൃത്വം നല്കിയ ശബരിമല പ്രക്ഷോഭത്തിൽ കോൺഗ്രസിന് സ്വാധീനമുറപ്പിക്കാനായില്ലെന്ന ആക്ഷേപത്തിന് ഫലപ്രദമായ പരിഹാരമെന്ന നിലയിലാണ് പുതിയ വിഷയങ്ങള് ഉയര്ത്തിക്കൊണ്ട് വരുന്നത്. ശബരിമല വിഷയത്തിലുള്ള പ്രതിഷേധം സഭയ്ക്ക് പുറത്തേയ്ക്ക് മാറ്റിയതോടെ സഭയിൽ പുതിയ തന്ത്രങ്ങള് മെനയുകയാണെന്ന് കോൺഗ്രസ് സൂചന നല്കിയിരുന്നു. കോൺഗ്രസ് എംഎൽഎ വി ഡി സതീശനാണ് പ്രളയദുരിതാശ്വാസം സംബന്ധിച്ച അടിയന്തിര പ്രമേയത്തിന് നോട്ടീസ് നല്കിയത്.
അതേസമയം, ശബരിമല വിഷയത്തിൽ മൂന്ന് യുഡിഎഫ് എംഎൽഎമാര് നിയമസഭാ കവാടത്തിൽ സത്യഗ്രഹം നടത്തിവരുന്ന സാഹചര്യത്തിൽ പ്രശ്ന പരിഹാരത്തിന് സ്പീക്കര് ചര്ച്ച നടത്തണമെന്ന പ്രതിപക്ഷ നേതാവിന്റെ ആവശ്യവും സ്പീക്കര് അംഗീകരിച്ചിട്ടുണ്ട്.
