ശബരിമലക്ക് വേണ്ടി സമരം തുടരുമെന്ന് കെ. സുരേന്ദ്രൻ
തിരുവനന്തപുരം: ജയിൽമോചിതനായ കെ.സുരേന്ദ്രന് ഗംഭീര സ്വീകരണം നൽകി ബിജെപി നേതൃത്വം. ശബരിമലയിലെ ആചാരസംരക്ഷണത്തിന് വേണ്ടിയുള്ള സമരത്തിൽ നിന്ന് പിന്നോട്ടില്ലെന്ന് കെ.സുരേന്ദ്രൻ വ്യക്തമാക്കി. ആചാരസംരക്ഷണത്തിനായുള്ള സമരത്തിൽ തുടർന്നും പങ്കെടുക്കുമെന്ന് സുരേന്ദ്രൻ പറഞ്ഞു. ശബരിമലയിൽ പ്രവേശിക്കുന്നതിന് കോടതിയുടെ അനുമതി തേടുമെന്നും സുരേന്ദ്രൻ മാധ്യമങ്ങളോട് വ്യക്തമാക്കി.
ശബരിമല ആചാരസംരക്ഷണത്തിന് വേണ്ടി നടത്തിയ സമരത്തിൽ താൻ നിയമലംഘനം നടത്തിയിട്ടില്ല. ജനാധിപത്യപരമായ സമരം മാത്രമേ നടത്തിയിട്ടുള്ളൂ എന്നും സുരേന്ദ്രൻ കൂട്ടിച്ചേർത്തു. ജയിലിൽ കഴിയുമ്പോഴും അവിശ്വാസികൾ ശബരിമലയിൽ ആചാരലംഘനം നടത്തുമോയെന്ന ഭയം ഉണ്ടായിരുന്നുവെന്നും സുരേന്ദ്രൻ പറഞ്ഞു. കേരളത്തിലെ ബിജെപി ശ്രീധരൻപിള്ളയുടെ നേതൃത്വത്തിൽ ഒറ്റക്കെട്ടാണെന്നും സുരേന്ദ്രൻ പറഞ്ഞു.
സന്നിധാനത്ത് അയ്യപ്പഭക്തയെ വധിക്കാന്‍ ശ്രമിച്ച കേസില്‍ റിമാന്‍ഡില്‍ കഴിഞ്ഞ ബിജെപി സംസ്ഥാന ജനറല്‍ സെക്രട്ടറി കെ സുരേന്ദ്രന് ഇന്ന് രാവിലെയാണ് ജാമ്യം നേടി ജയിലില്‍ നിന്ന് പുറത്തിറങ്ങിയത്. ജയിലിന് പുറത്ത് ഗംഭീര സ്വീകരണമാണ് കെ സുരേന്ദ്രന് ബിജെപി പ്രവര്‍ത്തകര്‍ നല്‍കിയത്. ബിജെപി സംസ്ഥാന പ്രസിഡണ്ട് പിഎസ് ശ്രീധരന്‍ പിള്ള, നേതാക്കളായ എംടി രമേശ്, വി മുരളീധരന്‍ എംപി, ജെആര്‍ പത്മകുമാര്‍ തുടങ്ങിയവര്‍ സുരേന്ദ്രനെ സ്വീകരിക്കാനായി ജയിലിലെത്തി. കേസില്‍ കര്‍ശന ഉപാധികളോടെ ഹൈക്കോടതി കഴിഞ്ഞ ദിവസം ജാമ്യം അനുവദിച്ചതോടെയാണ് സുരേന്ദ്രന്‍റെ ജയില്‍ മോചനം സാധ്യമായത്.
ശബരിമലയില്‍ 52കാരിയായ അയ്യപ്പഭക്തയെ വധിക്കാന്‍ ഗൂഢാലോചന നടത്തിയ കേസിലാണ് ഏറ്റവുമൊടുവില്‍ ജാമ്യം ലഭിച്ചിരിക്കുന്നത്. പത്തനംതിട്ട ജില്ലയിലേക്ക് പ്രവേശിക്കരുത് എന്നതടക്കമുള്ള കര്‍ശന ഉപാധികളോടെയാണ് ഹൈക്കോടതി ജാമ്യം അനുവദിച്ചത്. ജാമ്യനടപടികളെല്ലാം ഇന്നലെ വൈകീട്ടോടെ തന്നെ പൂര്‍ത്തീകരിച്ചെങ്കിലും സമയം വൈകിയതു കൊണ്ടാണ് സുരേന്ദ്രന് ഇന്നലെ പുറത്തിറങ്ങാന്‍ കഴിയാതിരുന്നത്.
