കെഎസ്ആർടിസി കൂട്ട പിരിച്ചുവിടൽ: 700 ലിമിറ്റഡ് സർവ്വീസ് ബസുകളുടെ സർവ്വീസ് മുടങ്ങി

തിരുവനന്തപുരം: ഹൈക്കോടതി ഉത്തരവിനെത്തുടർന്ന് കെഎസ്ആർടിസി എംപാനൽ ജീവനക്കാരെ പിരിച്ചുവിട്ടതിനെത്തുടർന്ന് ബുധനാഴ്ച എഴുന്നൂറോളം സർവ്വീസുകൾ മുടങ്ങി. എറണാകുളം മേഖലയിലാണ് ഏറ്റവും കൂടുതൽ സർവ്വീസ് മുടങ്ങിയിരിക്കുന്നത്. അതേസമയം ശബരിമല സർവ്വീസുകളിൽ മുടക്കം വന്നിട്ടില്ല.

ജീവനക്കാരെ പിരിച്ചുവിട്ടതിന്റെ തൊട്ടുപിറ്റേന്ന് ചൊവ്വാഴ്ച 1763 സർവ്വീസുകളാണ് മുടങ്ങിയത്. ചൊവ്വാഴ്ചയും എറണാകുളം മേഖലയിലായിരുന്നു സർവ്വീസ് മുടങ്ങിയത്. 769 സർവ്വീസുകൾക്കാണ് മുടക്കം വന്നത്. സർവ്വീസ് മുടങ്ങിയ മേഖലകളിൽ യാത്രാ ക്ലേശം രൂക്ഷമാണ്. തിങ്കളാഴ്ചയാണ് ഹൈക്കോടതി നിർദ്ദേശത്തെത്തുടർന്ന് കെഎസ്ആർടിസി എംപാനൽ ജീവനക്കാരെ പിരിച്ചുവിട്ടത്.

അതേസമയം മുടങ്ങിയ സർവ്വീസുകൾ നേരെയാക്കാൻ മറ്റ് വിഭാഗത്തിലുള്ള ജീവനക്കാരെ ഉപയോഗിക്കാനും കെഎസ്ആർടിസിക്ക് പദ്ധതിയുണ്ട്. ടെക്നിക്കൽ വിഭാഗത്തിലുള്ള ജീവനക്കാരെ താത്കാലികമായി കണ്ടക്ടർ തസ്ഥികയിലേക്ക് നിയമിക്കാനാണ് കെഎസ്ആർടിസി ആലോചിക്കുന്നതെന്നും കെഎസ്ആർടിസി എംഡി ടോമിൻ ജെ തച്ചങ്കരി ടൈംസ് ഓഫ് ഇന്ത്യയോട് പറഞ്ഞിരുന്നു. സ്ഥിരം കണ്ടക്ടർമാരെ അധിക സമയം ജോലിചെയ്യാൻ പ്രേരിപ്പിക്കുമെന്നും അതിന് അധിക വേതനം നൽകുമെന്നും തച്ചങ്കരി പറഞ്ഞു.