യതീഷ് ചന്ദ്രക്കെതിരെ ലോക്സഭയിൽ അവകാശലംഘന നോട്ടീസ്
ന്യൂഡൽഹി: എസ്പി യതീഷ് ചന്ദ്രക്കെതിരെ കേന്ദ്രമന്ത്രി പൊൻ രാധാകൃഷ്ണൻ ലോക്സഭയിൽ അവകാശലംഘനത്തിന് നോട്ടീസ് നൽകി. ശബരിമല വിഷയം സഭയിൽ ഉന്നയിക്കുന്നതിനിടെയാണ് എസ്പിക്കെതിരെ നോട്ടീസ് നൽകിയത്. നിലക്കലിൽ സുരക്ഷാ ചുമതലയിലുണ്ടായിരുന്ന യതീഷ് ചന്ദ്ര ഒരു ലോക്സഭാ അംഗത്തോട് പെരുമാറേണ്ട രീതിയിൽ അല്ല പെരുമാറിയതെന്ന് നോട്ടീസിൽ ചൂണ്ടികാണിക്കുന്നു.
കേന്ദ്രമന്ത്രിയായ തന്നെ ശബരിമല സന്ദർശനത്തിനിടെ യതീഷ് ചന്ദ്ര അപമാനിച്ചെന്ന് പൊൻ രാധാകൃഷ്ണൻ പറഞ്ഞു. പൊൻ രാധാകൃഷ്ണൻ നൽകിയ നോട്ടീസ് പരിശോധിക്കുമെന്ന് ലോക്സഭാ സ്പീക്കർ വ്യക്തമാക്കി. നിലക്കൽ നിന്ന് സ്വകാര്യ വാഹനങ്ങൾ പമ്പയിലേക്ക് കടത്തി വിടണമെന്ന കേന്ദ്രമന്ത്രിയുടെ ആവശ്യം യതീഷ് ചന്ദ്ര അംഗീകരിച്ചില്ല. വാഹനങ്ങൾ പമ്പയിലേക്ക് വിടാത്തത് തീർഥാടകർക്ക് ബുദ്ധിമുട്ട് ഉണ്ടാക്കിയെന്നും കേന്ദ്രമന്ത്രി ആരോപിച്ചു.
